Հեմոֆիլիայով հիվանդների հայկական ասոցիացիայի անդամներն առաջիկայում նախատեսում են առողջապահության նախարարի հետ հանդիպում ունենալ եւ ներկայացնել իրենց հուզող հարցերը, մասնավորապես հեմոֆիլայով հիվանդների դեղերով ապահովելու հարցը:
Այսօր Յոլյանի անվան արյունաբանական կենտրոնում Ասոցիացիայի նիստում նման որոշում է ընդունվել:
NEWS.am Medicine-ի թղթակցի հետ զրույցում Հեմոֆիլիայով հիվանդների հայկական ասոցիացիայի նախագահ Տատյանա Խաչատրյանը նշել է, որ հեմոֆիլիայի նվազագույն բուժման ապահովման համար պետությունը պետք է տարեկան 8-րդ եւ 9-րդ գործոնի 1.2 մլն միավոր գնի:
Այսօր պետությունը 8-րդ գործոնի 500 հազար միավոր է գնում:
«Դեղերի պակասը լրացվում է Հեմոֆիլիայի միջազգային ֆեդերացիայի կողմից տրված հումանիտար օգնության շնորհիվ: Այս տարի մենք հումանիտար ճանապարհով 8-րդ եւ 9-րդ գործոնի 1 մլն միավոր ենք ստացել», - ասել է նա:
Կինը նշել է, որ մեծ խնդիր է նաեւ այն, որ երկրի մարզերում արյունաբաններ չկան:
«Մենք առաջարկում ենք մարզային թերապեւտների համար վերապատրաստման դասընթացներ անցկացնել, որպեսզի ամեն մի մարզում գոնե մեկ արյունաբան լինի: Չեմ կարող չնշել այն փաստը, որ հեմոֆիլիայով հիվանդի անձնագիրը մեր կազմակերպության միջոցով է տրվում, թեեւ ըստ էության դրանով պետք է զբաղվի Արյունաբանական կենտրոնը», - ասել է նա՝ պարզաբանելով, որ այդ փաստաթղում նշված են հիվանդի անունը, ազգանունը, հեմոֆիլիայի տեսակը (А, В, С), արյան խումբը:
«Շտապ բժշկական օգնության անհրաժեշտության դեպքում դրանք շատ կարեւոր տվյալներ են», - ասել է Տատյանա Խաչատրյանը:
Ասոցիացիայի ղեկավարը հավելել է, որ արտահերթ խորհրդարանական ընտրություններից հետո իրենք մտադիր են իրենց հուզող հարցերով դիմել վարչապետին:
Հետևեք NEWS.am Medicine-ին Facebook-ում և Twitter-ում